AdygBusiness - business blog                                            Email: adygbusiness@gmail.com                             Maykop:
 

Мэкъумэщ банкым ахъщэу къытlупщырэм Къэбэртэе-Бэлъкъарым %41,9 щыхигъэхъуагъ

Мэкъумэщ банкым икъутамэу Къэбэртэе-Бэлъкъарым щыlэм мэкъумэщ къыдэгъэкlыжьыным пылъ хъызмэтшlапlэу республикэм итхэм лъэхъан lофшlэнхэм апае чlыфэу аритыгъэр сомэ млн 239,5 нэсы. БлэкIыгъэ илъэсым ифэдэ уахътэ егъэпшагъэмэ ар %41,9 нахьыбэ мэхъу. Мыщ щыщэу мэкъумэщ бизнес гурытым фатlупщыгъэр сомэ млн 95,1, бизнес цlыкlум пае - сомэ млн 144,4 фэдиз, - банкым ипресс-къулыкъу къыфиlопщыгъ РИА КБР. 

2021 илъэсым имэкъуогъу мазэ и 1 ехъулlэу, бизнес гурытым ыкlи цlыкlум щылажьэхэрэм чlыфэу аратыгъэр сомэ млн 900 кlахьэ. 

"Мэкъумэщ хъызмэтым иlэпыlэгъу Мэкъумэщ банкыр, лъэхъан lофшlэнхэм апае мылъку аритыным лъэшэу ынаlэ тет. Банкым чlыфэтын программэу иlэхэм яшlуагъэкlэ шъолъырым ичlыгулэжьхэм мылъкоу аштагъэр губгъо lофшlэнхэм апэlуагъахьэ, яамалхэр рагъэкъух ыкlи инвестициехэмкlэ проектхэр агъэцакlэх", - къыхигъэщыгъ Къэбэртэе-Бэлъкъарымкlэ Мэкъумэщ банкым икъутамэ ипащэу Сэкурэ Алим.